అనంతపురంలో టీడీపీ మహిళా నేత తేజస్విని కారు ధ్వంసం

అనంతపురం జిల్లాలో తెలుగుదేశం పార్టీ నాయకురాలి కారుపై దాడి జరిగింది. టీడీపీ తెలుగు మహిళ రాష్ట్ర అధికార ప్రతినిధి తేజస్విని కారును గుర్తు తెలియని వ్యక్తులు ధ్వంసం చేశారు. లక్ష్మీనగర్‌లో పార్క్ చేసి ఉన్న ఆమె కారుపై దుండగులు రాళ్లతో దాడికి పాల్పడ్డారు. ఈ ఘటనపై తేజస్విని పోలీసులకు ఫిర్యాదు చేశారు.

ఈ దాడిపై తేజస్విని తీవ్ర ఆగ్రహం వ్యక్తం చేశారు. రాజకీయంగా తనను ఎదుర్కోలేకనే ప్రత్యర్థులు ఇలాంటి దాడులకు పాల్పడుతున్నారని ఆరోపించారు. ఇది వైసీపీ కార్యకర్తల పనేనని ఆమె అనుమానం వ్యక్తం చేశారు. "ఒక ఆడబిడ్డపై ఇంత దౌర్జన్యానికి పాల్పడతారా?" అని ఆమె ఆవేదన చెందారు. దమ్ముంటే ఎదురుగా వచ్చి దాడి చేయాలని, ఇలాంటి దొంగ దాడులు సరికాదని సవాల్ విసిరారు.

తేజస్విని ఫిర్యాదు మేరకు కేసు నమోదు చేసుకున్న పోలీసులు దర్యాప్తు ప్రారంభించారు. సంఘటనా స్థలానికి సమీపంలోని సీసీ కెమెరా ఫుటేజీలను పరిశీలిస్తున్నామని, నిందితులను త్వరగా గుర్తించి కఠిన చర్యలు తీసుకుంటామని తెలిపారు. కాగా, గతంలోనూ తేజస్విని కారుపై ఇలాంటి దాడే జరగడం గమనార్హం.